Sī án-chóaⁿ góa beh khai-sí iōng pit siá？

Chū-chiông kū-nî o̍h ē-hiáu pe̍h-ōe-jī í āu, góa chit-má lóng ē chīn-liāng siá pe̍h-ōe-jī, che chiah sī góa iōng lâi su-khó ê gí-giân. in-ūi sui-bóng kóng chū sè-hàn hō͘ ha̍k-hāu kà hôa-bûn, m̄-koh tī chhù iah sī kóng Tâi-gí, chhin-chiâⁿ lāi ū kheh-lâng, m̄-koh in mā lóng bô beh kà gún kóng Kheh-ōe. Kiat-bóe tō sī án-ne, góa ē hiáu kóng Tâi-gí, Kheh-gí kan-na thiaⁿ ū chit-tiám-á. Góa tō án-ne ē hun tī chhù kóng Tâi-gí, tī ha̍k-hāu kóng Hôa-gí, tú tio̍h kóng hôa-gí ê tō kóng hôa-gí, kóng Tâi-gí ê tō ōaⁿ Tâi-gí, chin chū-jiân. 

M̄-koh, án-ne iau sī bô-oân-choân. In-ūi lán kóng ē-hiáu chi̍t-chióng gí-giân ê phiau-chún, sī ài thiaⁿ-bat, tha̍k-ū, ē-hiáu kóng, koh ē-hiáu siá, án-ne chiah sǹg sī bat. Nā bô kan-na ē kóng bē tha̍k, bē sià, he tō sī bûn-bông, tâi-gí kóng ê chhiⁿ-mî-gû lah. bô siáⁿ lē-gōa. So͘-í góa chāi chi̍t-nî chêng ê-hiáu kóng ē-hiáu-thiaⁿ Tâi-gí, m̄-koh bē-hiáu tha̍k, koh-khah bē-hiáu siá, mā it-tit siong-sìn kóng Tâi-gí bô-jī chit-ê phiàn-kiok. Sū-si̍t tiō sī, pah-kúi-tang chêng, ūi tiō bē hō͘ it poaⁿ lâng khah ū hāu-lu̍t kiû-tio̍h tì-sek, se-iûⁿ kàu-sū iōng lô-má jī kā Tâi-oân lâng leh kóng ê gí-giân siá khì--lâi, kà ta̍k-ke siá, tha̍k. Mā kái siān tong-sî m̄-bat-jī, bô-tì-sek ê chêng-hêng. Chit hāng kì-sái ê lô-má-jī hē-thóng tiō sī Pe̍h-ōe-jī. I chûn-chāi í-keng chin kú á, chí-sī āu-lâi kok-bîn-tóng kím-chí Tâi-oân lâng iōng, chin chē lâng lóng m̄ chai. Khòaⁿ tio̍h pe̍h-ōe-jī soah leh pâi-thek i.

Chū-chiông kū-nî chhoe, góa khai-sí o̍h pe̍h-ōe-jī, tō hoat-hiān góa tùi i ê chiap-siū-tō͘ chiok koân, o̍h nn̄g-saⁿ kang tō ē-hiáu, ka siōng ū hó iōng ê sū-ji̍p-hoat, góa tiāⁿ-tiāⁿ kám-kak siá tâi-bûn pí siá hôa-gí khah kan-tan. Chòe-kīn góa tiō siūⁿ kóng lâi iōng pit siá, án-ne khah ē-tàng chai-iáⁿ ka-kī ê siaⁿ-tiāu sī-m̄-sī ū pá-ak.