ki-chhó ài phah hó

Ū chi̍t kang khòaⁿ chi̍t pún ōe-pún（l’albo illustrato）I ê lāi iông bô khùn-lân, tha̍k lo chin sūn. M̄-koh in-ūi chin sūn, āu-lâi koh tha̍k chi̍t pái soah hoat-hiān ū chi̍t kù lú tha̍k lú m̄ bat. Góa mā kì Google khòaⁿ ū chit kù kâng khoán ê kù-hêng bô. Kiat kó khoán tio̍h chi̍t kù soah hō͘ góa pún lâi jīn-ûi ka-kī bat--ê piàn chò oân-choân bô pá-ak. Āu lâi koat têng khì chhōe I-ta-lī lâng mn̄g. Kiat-lūn sī, góa goân-pún tē-1-pái tha̍k ê sî lí-kái sī tio̍h--ê. Kui ê kiâⁿ oai khì tō sī góa tha̍k tē-2-pái khai-sí. Tha̍k tē-2-pái tō khah bô ti̍t-kak, ē siūⁿ kóng chit kù ōe ê tōng-sû táu-té sī to͘ chi̍t ê…（in-ūi he sī chi̍t kù ū iōng "la proposizione soggettiva" lâi chò chù-sû "il soggetto della proposizione principale", só͘-í ē khòaⁿ tio̍h 2 ê tōng-sû. Iah koh lóng sī indicativo presente ）tō ē kā pún-té chin kan-tan ê chi̍t kù ōe thiah kah hoe-lok-lok. Iah nā koh khòaⁿ tio̍h chi̍t ê chhò-gō͘ ê mih-kiāⁿ tō chin hāi. Keng kòe chit pái, góa kám-kak tû liáu ài sìn-jīn ka-kī ê ti̍t-kak í gōa, ki-chhó iah sī ài phah hō͘ hó chiah bē chhiūⁿ góa chit pái án-ne.