idem con patate+poc'anzi

Kin-á-ji̍t beh lâi kì nn̄g ê góa téng lé-pài khòaⁿ tio̍h ê sû, nn̄g ê eng-kái sǹg sī modo di dire ê mi̍h-kiāⁿ. (góa sī sûn kì-lo̍k niā niā)

Téng lé-pài tī bāng-lō͘ téng khòaⁿ tio̍h chi̍t ê gī-tê leh kóng “Siáng（tó chi̍t ê bîn cho̍k） sī AuChiu siōng sú lâng him-siān ê？”（Qual è il popolo europeo più invidiato?） Che sī Italia chi̍t tīn lâng ê thó-lūn. In kóng góa-kok lâng jīn-ûi in cha-po͘ lâng chhēng chhio-chhio kap chng súi-súi ê mē-á leh lim chiú lim ka-pi chi̍t khoán ìn-siòng si̍t-chāi sī chhò-gō͘ koh chin piáu-bīn chin hu-chhián--ê. Khó-lêng tō ná hia ê stranieri infatuati dell’Italia（siáu bê Italia ê gōa-kok lâng）, in ê gē-su̍t, kiàn-tio̍k, liû-hêng...... chia ê ū pí lâng khah súi. M̄-koh ū tòa tī gōa-kok ê lâng kóng, gōa-kok chin chē lóng iâⁿ kòe in kok lāi......tî-hui sī campanilisti(pún-thó͘ chì siōng chú-gī chiá), tō bē khì kóng lâng gōa-kok pí bē kòe in.

Ū lâng tông-ì bó͘-mi̍h lâng ê kóng hoat, tō hôe kóng ：Idem con patate......

Che tō sī góa kín-á-ji̍t beh kì-lo̍k ê sû. Idem con patate.

Idem, nā chi̍t-kóa lâng it-tēng ē kóng, che chia kán-tan, chiok chē Eng-gí lī-hāi ê lâng lóng mā chai i ê ì-sù, tō sī：kap téng bīn ê kâng-khoán. Idem, sī ibidem ê kán-siá.

Nā sī Idem con patate, ì-sù mā kâng, chí sī ke chi̍t ê Patate, patata, bé-lêng-chî／iû-chî, tī kháu-gí siōng sī beh piáu tap kóng tông-ì téng bīn ê lâng siá ê í-kiàn.

Idem con patate, sī góa thâu pái khòaⁿ tio̍h--ê, kî si̍t chin hó lí-kái, góa chí sī m̄ bat khòaⁿ kòe, kā kì lo̍h--lâi. iû kî sī góa chhâ kái-soat ê sî， khòaⁿ tio̍h kái-soat lāi koh chhut hiān chi̍t ê sû mā chin chhù-bī, tì-sú góa mā siūⁿ beh kā kì-khí--lâi. he tō sī ：

lo stesso come già detto poc’anzi, chit kù lāi bīn ê poc’anzi, tō sī thâu-tú-á ê ì-sù. án-chóaⁿ iōng？ mā chin kán-tan：

È stato detto poc’anzi. （Thâu-tú-á kóng kòe ah.）