Kàu-chong Francesco tàu té kóng siáⁿ？

Siaⁿ bêng： góa bô leh thé i kóng ōe. 

Thian-chú-kàu ê thâu-lâng, Kàu-chong Francesco（Jorge Mario Bergoglio）tī Sūi-sū tiān-tâi（Radiotelevisione svizzera, RSI) ê chi̍t tiûⁿ hong-mn̄g tiong, kóng tio̍h Ucraina ài ū giâ pe̍h-kî tâm-phòaⁿ ê ióng-khì, kiat-kó chi̍t tōaⁿ ōe hō͘ chin chē lâng chiok siūⁿ khì. Ū lâng tō chhōe chhut le̍k sú siōng Thian-chú-kàu-hōe lóng sī kap chhim-lia̍k-chiá khiā chò hóe ê le̍k-sú, kóng che bô siáⁿ hó kî-koài. Iah nā lî lán khah kīn ê ū chi̍t chān tō sī bô gōa chē nî í-chêng, Hiang-káng ê su-ki-chú-kàu Joseph Zen Ze-kiun，S.D.B（陳日君）ūi tio̍h kiaⁿ Vaticano ē khì soán tio̍h Hiang-káng kàu-hōe lāi chhin Tiong-kok ê kè-jīm lâng, i khì Vaticano siūⁿ beh kìⁿ Kàu-chong Francesco lâi tâm, Kàu-chong Francesco hō͘ Joseph Zen Ze-kiun，S.D.B khang tán 120 tiám cheng lóng bô beh kap i kìⁿbīn.（Hôa-bûn pò-tō）In ūi Vaticano kap Tiong-kok í-keng kóng hó chi̍t kóa tiâu-kiāⁿ. Chit kiāⁿ tài-chì hō͘ lán mā ē siūⁿ kóng bān it Tâioân chhut tài chì, i mā sī ē án-neh tùi-thāi Tâioân.

M̄ koh lán seng mài kóng i ē án-chóaⁿ tùi-thāi Tâioân, góa sī siūⁿ beh kóng, mûi-thé liám-thâu-khì-bóe leh pò-tō ê hāu-kó si̍t chāi chin kiaⁿ lâng. Chi̍t-ê-á liân lán chia mā mē--kah. Sui jiân i kóng ê sī Ucraina ài ū giâ pe̍h-kî ê ióng-khì, m̄ sī kiò Russia ài ū thêng chhiú ê ióng khì, si̍t chāi hō͘ lâng siūⁿ khì. M̄ koh hán leh ū lâng kā hit ê hóng- mn̄g khòaⁿ oân choân（sui jiân khòaⁿ oân mā bô it tēng ū khah hó）

Góa tī chia siūⁿ beh kā chi̍t kóa mih-kiāⁿ tah chhut lâi, hō͘ lán khòaⁿ khah chai sī án-chóaⁿ Kàu-chong ē kóng chhut chit khoán ōe......sui-jiân góa mā ū jīn-ûi i kóng ōe thài bô sió-sim, m̄ koh hit ê kí-chiá mā ū khó lêng chá tō siat-kè hó chú-tê kap i mn̄g ê hong-sek ē tài lâi chit-ê hāu-kó. Góa ē án-neh kám-kak, sī in-ūi in koh tī kok hong lóng leh mē Kàu-chong ê sî, kā hong-mn̄g ê hit tōaⁿ tek-pia̍t thé chhut--lâi, koh hō͘ chi̍t-ê piau-tê, hō chò：

L’intervista RSI al Papa, repliche “roventi” 

——RSI hong-mn̄g Kàu-chong, i sio-kún-kún ê hôe tap.

Le affermazioni del Pontefice sul “coraggio della bandiera bianca” e l’invito a negoziare hanno suscitato le ire degli ucraini (e non solo)

——Kàu-chong khak tēng kóng “giâ pe̍h-kî ê ióng-khì” kap iau chhiáⁿ tâm phòaⁿ ín khí Ucraina lâng ê hún khài（m̄ nā in...）

https://www.rsi.ch/info/mondo/L%E2%80%99intervista-RSI-al-Papa-repliche-%E2%80%9Croventi%E2%80%9D--2092313.html

Góa jīn ûi kí-chiá hóng-mn̄g sī tiâu-kang--ê, in-ūi i chiat-bo̍k ê miâ kiò chò Cliché, chit ê jī tō sī kóng “bô siáⁿ sin ì ê giân-lūn/su-sióng/chok-phín.” I chit chi̍p ê chú-tê sī PE̍H-SEK, nā sī án-neh, pe̍h-sek tī it poaⁿ lâng ê ìn-sióng tō sī Vaticano tī in ê ka-kī ê pò-tō só͘ kóng--ê ：

（...）in una puntata dedicata al bianco, il colore del bene, della luce, ma sul quale gli errori e la sporcizia risaltano maggiormente.

——（...） tī chit chi̍p chiat-bo̍k chú-tê sī pe̍h-sek, sī tāi páiu hó-ê, kong-bêng ê sek-chúi, tī i ê téng bīn mā ē hō͘ chhò-gō͘ kap lah-sap koh khah bêng hián.

https://www.vaticannews.va/it/papa/news/2024-03/papa-francesco-intervista-radio-televisione-svizzera-ucraina.html


Chit khoán chiat-bo̍k kap chú-tê, ka siōng chit-ê chhēng pe̍h saⁿ ê chong-kàu kài tōa lâi-pin, tō it-tēng ē kóng tio̍h hia ê tāi chì. Lí nā ū khòaⁿ tio̍h oân chéng ê hóng-mn̄g, chai iáⁿ kí-chiá án-chóaⁿ mn̄g , hō͘ i ê kóng chhut hia ê ōe jiá lâng kā mē, tō chai góa leh kóng siáⁿ.

Kí-chiá mn̄g Kàu-chong ê būn-tê sī án-neh:：

In Ucraina c’è chi chiede il coraggio della resa, della bandiera bianca. Ma altri dicono che così si legittimerebbe il più forte. Cosa pensa?

—— tī Ucraina ū lâng leh kóng ài ū ióng khì tâu-hâng, giâ pe̍h-kî. M̄ koh kî tha ū lâng kóng nā án-neh ē koh khah kā kiông chiá ha̍p-lí-hòa. Chhiáⁿ mn̄g lí ê siūⁿ hoat sī siáⁿ？

Kàu-chong hôe：

“È un’interpretazione. Ma credo che è più forte chi vede la situazione, chi pensa al popolo, chi ha il coraggio della bandiera bianca, di negoziare. E oggi si può negoziare con l’aiuto delle potenze internazionali. La parola negoziare è una parola coraggiosa. Quando vedi che sei sconfitto, che le cose non vanno, occorre avere il coraggio di negoziare. Hai vergogna, ma con quante morti finirà? Negoziare in tempo, cercare qualche paese che faccia da mediatore. Oggi, per esempio nella guerra in Ucraina, ci sono tanti che vogliono fare da mediatore. La Turchia, si è offerta per questo. E altri. Non abbiate vergogna di negoziare prima che la cosa sia peggiore”.

——che sī chi̍t khoán kóng hoat. M̄ koh góa siong sìn sī khah kiông ê lâng chiah ē khóaⁿ chêng-sè, ē khó lū tio̍h jîn-bîn, ū ióng-khì giâ pe̍h-kî, ē lâi tâm-phòaⁿ . Chit-má ē-tàng khò tio̍h kok-chè siong tōa kok ê pang-chān lâi tâm. Tâm-phòaⁿ chit-ê sû sī chi̍t ê ióng kám ê sû. Lí khóaⁿ tio̍h lí í-keng si̍t-pāi, chêng-sè bô hó, tō su iàu ū tâm-phòaⁿ ê ióng khì. Lí kám kak kiàn-siàu, m̄ koh koh ē chò sêng gōa chē lâng sí bông neh？Ài pá-ak sî kan lâi tâm, ài chhōe kî tha kok-ka lâi chò tiâu-kái-jîn. Hiàn-chhú-sî, pí-lūn-kóng tī Ucraina ê chiàn-cheng, tō chin chē kok-ka siūⁿ beh lâi chò tiâu kái. Turchia kap kî tha kok-ka tō ū beh chò. Chāi chêng sè iah bē ok hòa chìn chêng, lán mài kám kak pháiⁿ sè ài lâi tâm phòaⁿ.

https://www.rsi.ch/info/mondo/Conflitto-a-Gaza-%E2%80%9Cdue-responsabili%E2%80%9D.-Ucraina-%E2%80%9Cil-coraggio-della-bandiera-bianca%E2%80%9D--2091038.html