Bô táⁿ lâng tha̍k chheh
Góa it-hiòng lóng chiok bô-táⁿ, m̄-káⁿ khòaⁿ khióng-pò͘ phìⁿ mā m̄-kán tha̍k khióng-pò͘ kap pi-siong ê chheh.
我一向攏足無膽，毋敢看恐怖片嘛毋敢讀恐怖佮悲傷ê冊。
Ū-sî kám-kak án-neh ê jîn-seng chin chhián-po̍h, só͘-í góa kin-á-ji̍t kā chi̍t pún cha̍p nî chêng bé ê chheh thê chhut lâi tha̍k, siáⁿ chai tē it phiⁿ bô tha̍k oân tō hō͘ góa sim chiok tîm-tāng.
有時感覺按呢ê人生真淺薄，所以我今仔日共一本10年前買ê冊來讀，誰知第一篇無讀完就予我心情足沉重。
Ē thê chhut ióng-khì kā hit pún chheh thê chhut lâi tha̍k, chi̍t hong-bīn sī chit kúi nî lóng bô khì Italia, góa siōng ài khì sē in ê chheh-tiàm, iah bāng-lō͘ bé chheh, ūn-hùi chiok kùi, góa mā bô ài tiān-chú-chheh, só͘-í kā hia-ê m̄-káⁿ khòaⁿ ê chheh péng chhut lâi tha̍k, chi̍t hong-bīn chhì ka-ki ê ióng-khì, chi̍t hong-bīn tha̍k italiano, bē sái hō͘ pha-hng khì.
會提出勇去共彼本冊提出來讀，一方面是這幾年攏無去伊大利亞，我上愛去旋怹ê冊店，抑網路買冊，運費足貴，我嘛無愛電子冊，所以共遐个毋敢看ê冊反出來讀，一方面試家己ê勇氣，一方面讀italiano，袂使予拋荒去。
Hit pún chheh ū jōa khióng-pò͘？He sī Italia tiōng-iàu ê chok-ka Dacia Maraini kin-kù chi̍t-kóa chin-si̍t sū-kiāⁿ só͘ siá ê té-phiⁿ sió-soat, chheh miâ mā chin kiaⁿ-lâng, kiò chò BUIO, O͘-àm. Chheh lāi cha̍p-jī phiⁿ lóng sī chi̍t kóa siā-hōe sū-kiāⁿ kái pian ê pi-kio̍k. sū-kiāⁿ sī sèng-po̍k-le̍k, sat-hāi, ペドフィリア（pedophilia）, jîn-kháu-hoàn-māi chia ê, siū hāi chiá lóng sī gín-á, siáu-liân......kò͘-sū sī leh kóng sè-kài o͘-àm ê hit bīn.
彼本冊有偌恐怖？彼是伊大利亞重要ê作家Dacia Maraini（唸：Ta-chhi-a Ma-lai-nih）根據一寡真實事件所寫ê短篇小說，冊名嘛真驚人，叫做BUIO，烏暗。冊內12篇攏是一寡社會事件改編ê悲劇，事件是性暴力、殺害、ペドフィリア(戀童癖)遮ê、人口販賣遮ê，受害者攏是囡仔、少年......故事是咧講世界烏暗ê彼面。
Tē it phiⁿ tō sī chi̍t-ê 7 hòe gián-á in-ūi pē-bú khin-hut, i hō͘ chi̍t-ê tiāⁿ tiāⁿ khòaⁿ tio̍h ê lâng phiàn khì chhiū-nâ lāi kiông-kan sat-hāi. Chi̍t phiⁿ bô tha̍k oân góa tō kám-kak sim lāi chiok kiaⁿ-hiâⁿ chiok tîm-tāng. Chái tī chhia téng tha̍k kàu hit-ê gín-á tē jī kang khì hō͘ lâng hoat-hiān sí khì, góa tú-hó kàu chām ài loh chhia, in-ūi kám-kak khióng-pò͘, chiok gāi-gio̍h, tì sú góa hoâi-gî sī-m̄-sī ài koh kè-sio̍k tha̍k loh khì, iah sī kóng ōaⁿ tha̍k pa̍t pún.
第一篇就是一个７歲囡仔因為父母輕忽，伊予一个定定看到ê人騙去樹林內強姦殺害。這篇無讀完我就感覺心內足驚惶足沉重。早起佇車讀到彼个囡仔第2工去予人發現死去矣，我拄好到站愛落車，因為感覺足恐怖，足礙虐，致使我懷疑是毋是愛閣繼續讀落去， 抑是講換讀別本。
Kî-si̍t tû liáu kiāⁿ tha̍k khióng-pò͘ kap pi-siong ê chheh, góa mā bô siáⁿ ài tha̍k sió-soat. khah chá bat tha̍k kòe chi̍t-kóa bē-bái ê sio-soat, m̄-koh m̄-sī tiāⁿ-tiāⁿ ū hit khoán tha̍k tio̍h hó chheh ê ki-iân, ū sî chi̍t-kóa sió-soat hō͘ lâng bô hoat-tō͘ ji̍p khì kò͘-sū lāi té, tō ē kám-kak khai hia ê sî kan si̍t-chāi sī lōng-hùi sèⁿ-miā.
其實除了驚讀恐怖佮悲傷ê冊，我嘛無啥愛讀小說。較早捌讀過一寡袂䆀ê小說，毋擱毋是定定有彼款讀著好冊ê機緣，有時一寡小說予人無法度入去故事內底，就會感覺開遐多時間實在是浪費生命。
M̄-kò góa mā sī ū tha̍k kòe chi̍t-kóa cheng-chhái ê chok-phín. Pí-lūn kóng Eng-kok/Pa-ki-su-thán chok-ka Mohsin Hamid ê chheh, Bí-kok chok-ka Safran Foer ê, koh khah chá mā ū Anna Karenina, Crime and punish, Secret Garden, The Last Temptation of Christ, góa mā tha̍k kòe chha-put-to só͘-ū Roald Dahl ê tōa-lâng gín-á chheh kap chū-toān...chi̍t-kóa Italia ê, chi̍t kóa Tiong-kok ê, góa khah chá mā chin kah-ì Hiang-káng ê 西西, chit nn̄g nî o̍h Tâi-bûn liáu-āu góa mā khai-sí ū leh tha̍k Tâi-bûn sió-soat, ū tha̍k kòe chi̍t-kóa Tân Lûi......Hoán-tó sī Tâi-oân ê Hôa-bûn sió-soat góa bô leh khòaⁿ. Chit-má siūⁿkhílâi, kî-si̍t mā sī tha̍k kòe bē chió, m̄-koh nā siūⁿ hō͘ chim-chiok, chia ê lóng m̄-sī chhiūⁿ BUIO hit khoán, góa siūⁿ eng-kai sī kiaⁿ ê sin-thé hō͘ lâng chhim-hoān ê kiaⁿ-hiâⁿ, koh ū in-ūi án-neh siūⁿ beh tô-pī ê kī-choa̍t. BUIO só͘ kóng ê o͘-àm, sī chi̍t chióng jio̍k-chiá bô hoat-tō͘ té-khòng, ū sî koh sī hoán-pōe lí ê tan-sûn sìn-jīm só͘ tòa lâi ê kiaⁿ-hiâⁿ.
毋擱我嘛是有讀過一寡精采ê作品。比論講英國/巴基斯坦作家Mohsin Hamid ê冊，美國作家Safran Foer，擱卡早嘛有讀Anna Karenina、Crime and punish、Secret Garden、The Last Temptation of Christ，我嘛讀過差不多所有Roald Dahl大人囡仔冊佮自傳...一寡伊大利亞ê冊，一寡中國ê，我嘛真合意香港ê西西，這2年學台文了後我嘛開始有咧讀台文小說，有讀過一寡陳雷......反倒是台灣ê華文小說我無咧看。這馬想起來，其實嘛是讀過袂少，毋擱若是想予斟酌，遮ê攏毋是像BUIO彼款，我想應該是驚--ê身體予人侵犯ê驚惶，擱有因為按呢想欲逃避ê拒絕。BUIO 所講ê烏暗，是一種弱者無法度抵抗，有時擱是反背你ê單純信任所帶來ê驚惶。
Ps.
In-ūi ē kiaⁿ, góa kan-na ji̍t sî chē chhia chiah tha̍k. Kin-á-ji̍t chá khí-khí koh kā thê chhut lâi tha̍k, in-ūi tē it phiⁿkhióng-pò͘ ê pō͘-hūn kòe ah, khai-sí leh kóng pān-àn ê kòe-têng, che sī góa ài tha̍k ê mih-kiāⁿ.
因為驚，我干焦日時坐車讀。今仔日早起擱共提出來讀，因為第一篇恐怖ê部份過矣，開始咧講瓣案ê過程，這是我愛讀ê物件。
Ū lâng kóng tha̍k sió-soat ē-tàng hō͘ lán ê thâu-náu khah oa̍h, in-ūi lán leh tha̍k ê sî, thâu-náu ē oa̍h tāng khì sióng-siōng, só͘-í kiaⁿ bóng kiaⁿ, ūi tio̍h beh toàn-liān ka-kī ê ióng-khì kap thâu-náu, tha̍k ē loh tō kè-sio̍k. Jî-chhiáⁿ, 10 nî chêng bé chit pún chheh sī hit sî tī Roma Italia lāu-su ê kiàn-gī, chóng sī tùi góa ū hó-chhù.
有人講讀小說會當予人頭腦較活，因為咱咧讀ê時，頭腦會活動去想像，所以驚罔驚，為著欲鍛練家己ê勇氣佮頭腦，讀會落就繼續。而且，10年前買這本冊是彼時佇羅馬伊大利亞老師ê建議，總是對我有好處。
讀小說ê好處
https://www.thenewslens.com/article/37045
Commenti
Posta un commento